Egoera latza dela badakigu, baina, beste bati azaldu beharko bagenio, ez genuke era zabalean azalduko zergatik. Gai konplexua da; adituen gaia. Eta horregatik, adituen bila joan gara. Gaia hobe ulertzeko helburuz, eta ideiak berriro ordenatu ahal izateko. Jonander Agirre Mikelez, Unai Fernandez de Betoño, AZET etxebizitza sindikatuko Ane Salvador, Aizpea Otaegi eta Denis Itxaso gonbidatu ditugu lubakira. Gai askoren inguruan mintzatu ahal izan gara haiekin, egunero entzuten ditugun kontzeptuak ulertuz eta ezagutzen ez genituenak gehituz. Hori baita azken helburua: ikastea. Txikitan marrazten genuen horretatik gertuago egon gaitezen.

Lehen saio honetan, Jonander Agirre Mikelez arkitekto donostiarrarekin elkartu gara. Harekin, Euskal Herriko etxebizitza egoeraren inguruan hitz egin dugu, etxea zer den definitu dugu, eta gure herrian etxebizitza gaiak izan dituen aldaerak ere ezagutu ditugu. Etxebizitza alternatiboak, bizitzeko moduak, merkatua, eta bestelako gaien inguruan aritu gara.